Evige industri-arbeidarar.

Vinteren og våren 2003 vert industriarbeidarane ved Hydro Aluminium og Fundamus fotograferte ein etter ein. Arve Ullebø og Geir Birkeland vil lage ei fotoutstilling med svart-kvitt portrett av alle dei 800 industriarbeidarane i Høyanger. Målet er å få ei samling verdfulle bilete som på sin måte dokumenterer historia om kvar enkelt industriarbeidar - ein rase som er i ferd med å døy ut. Høyanger-samfunnet har i snart hundre år vore avhengig av aluminiumsindustrien. Dei siste åra har det vore både opp- og nedturar. Men trass i store overskot på hjørnesteinsverksemdene blir det stadig færre industriarbeidarar. Arve Ullebø og Geir Birkeland har personleg teke initiativet til eit krafttak for å fotografere kvar enkelt arbeidar. På den måten vonar dei også å gje arbeidarane tilbake identiteten sin, i motsetnad til når arbeidarane berre figurerer som tal på bemanningslister.